|
Met die deregulering van die Graanbedryf vanaf 'n beheerde- na 'n vyemarkstelsel,
het die opsies van die graanprodusent aansienlik uitgebrei. Deur van die instrumente
wat beskikbaar is, kan produsente van die termynbeurs (SAFEX), sowel as van kontrakte
wat van tyd tot tyd beskikbaar is, soos voor plant-, voor oes-, en tydens lewering–kontrakte,
gebruik maak. Bogemelde kontrakte word beskikbaar gestel deur ‘n groot koper wat
‘n posisie in die mark wil inneem. Produsente moet in gedagte hou dat prys ‘n funksie
van die mark is.
Kontantpryse
By elke silo is daar daaglikse kontantpryse vir mielies wat van SAFEX afgelei word,
beskikbaar. Dit bied die boer die geleentheid om daagliks mielies te verkoop.
Kontrakte
Voor plant-kontrakte vir kommoditeite is van tyd tot tyd beskikbaar. Lede moet op
hulle hoede wees om nie meer as 30% van hulle verwagte oes op dié manier te bemark
nie. Kontrakte voor oestyd is veiliger, aangesien daar dan reeds ‘n oes op die land
is en die prys ‘n afgeleide aanduiding is van die verwagte oes. Kontrakte tydens
oestyd is markverwant, alhoewel markpryse dan normaalweg op die laagste vlakke verhandel.
Markinligting
Inligting is vandag baie werd aangesien ingeligte besluite slegs met markinligting
wat akkuraat is, geneem kan word. Suidwes Graanbemarking beskik oor die inligting
wat u kan help om ingeligte besluite te neem. Al die silo’s kry daagliks markinligting
wat opgedateer en relevant is. Faktore wat in ag geneem moet word is weersomstandighede,
internasionale pryse en tendense, sowel as wisselkoerse en ander ekonomiese aanwysers.
Die inligting kan by die silo’s verkry word of by enige een van Suidwes se graanbemarkers.
Suidwes Graan beskik oor die kundigheid om in al u behoeftes ten opsigte van graanbemarking
te voldoen en is in staat om u by te staan met raad en daad. Met die nodige inligting
tot ‘n mens se beskikking kan intelligente besluite geneem word.
|